પાક. પૂર્વ ક્રિકેટરની બીસીસીઆઈને અપીલ… બે અઠવાડિયા માટે હાર્દિક મને આપી દો…

બર્મિંગહૅમ,
ગુરૂવારે માનચેસ્ટરમાં વેસ્ટઈન્ડિઝ સામે રમાયેલી મેચમાં હાર્દિક પંડ્યા જે રીતે રમ્યો તે ભારતીય ટીમ માટે ઘણું મદદરૂપ સાબિત થયું હતું. પહેલા તો બેટિંગ વખતે તેણે ૩૮ બોલમાં ૪૬ રન બનાવ્યા હતા અને ત્યારબાદ બેટ્‌સમેન સુનીલ એમ્બ્રિસને ૩૧ રનમાં પેવેલિયન ભેગો કરી દીધો હતો. તેમ છતા પાકિસ્તાની પૂર્વ ઓલરાઉન્ડર અબ્દુલ રઝાકને હાર્દિક પંડ્યાના પ્રદર્શનમાં ઘણી બધી ખામીઓ જોવા મળી હતી.

૩૯ વર્ષીય રઝાકે સોશિયલ મીડિયા પર એક વીડિયો શેર કર્યો છે જેમાં એ કહી રહ્યો છે કે ‘ફક્ત બે જ મહિનામાં હું હાર્દિક પટેલને દુનિયાનો સર્વશ્રેષ્ઠ ઓલરાઉન્ડર બનાવી શકું છું.’ હાર્દિક પંડ્યાની ખામીઓ ગણાવતા તેણે કહ્યું કે ‘મેં ગુરૂવારની મેચમાં પહેલી વખત હાર્દિક પંડ્યાને રમતો જોયો, બેટિંગ કરતી વખતે તેના ફૂટવર્કમાં, બોડી બેલેન્સમાં મને ઘણી બધી ભૂલો જોવા મળી.’

અબ્દુલ રઝાક વીડિયોમાં કહી રહ્યો છે કે, ‘જો હું હાર્દિક પંડ્યાને બે અઠવાડિયા સુધી ટ્રેનિંગ આપું, તેને શિખવાડવાનો પ્રયત્ન કરું…. દુબઈમાં બે અઠવાડિયા તે મારા હાથ નીચે ટ્રેનિંગ લે તો હું તેને વિશ્વનો સર્વશ્રેષ્ઠ હિટર બનાવી શકું છું. જો બીસીસીઆઈ હાર્દિક પંડ્યામાં સુધારો લાવવા માંગતી હોય તો હું તેને કોચિંગ આપવા માટે તૈયાર છું. ફક્ત બે જ અઠવાડિયામાં હું તેને દુનિયાનો નંબર વન ઓલરાઉન્ડર બનાવી શકું છું.’