અમ્પાયરના નિર્ણય પર અસંતોષ વ્યક્ત કરતા જેસન રોયને દંડ ફટકારાયો…

અમ્પાયરના નિર્ણય પર અસંતોષ વ્યક્ત કરવા માટે ૩૦ ટકા મેચ ફીનો દંડ ફટકારવામાં આવ્યો..

બમઘમ,
ઈંગ્લેન્ડના ઓપનિંગ બેટ્‌સમેન જેસન રોયે ઓસ્ટ્રેલિયા વિરુદ્ધ બીજી સેમિફાઇનલમાં મળેલી જીત દરમિયાન અમ્પાયરના નિર્ણય પર અસંતોષ વ્યક્ત કરવા માટે ૩૦ ટકા મેચ ફીનો દંડ ફટકારવામાં આવ્યો છે. રોય પર આઈસીસી આચાર સંહિતાના લેવલ એકના ઉલ્લંઘનનો આરોપ છે.

આઈસીસીએ એક નિવેદનમાં ‘રોયે ખેલાડીઓ અને સહયોગી સ્ટાફ માટે આચાર સંહિતાની ધારા ૨.૮નું ઉલ્લંઘન કર્યું છે, જે આંતરરાષ્ટય મેચમાં અમ્પાયરના નિર્ણય પર વિરોધ વ્યક્ત કરવાના સંબંધમાં છે. આ ઘટના ઈંગ્લેન્ડની ઈનિંગની ૧૯મી ઓવરની છે જ્યારે રોયે વિકેટની પાછળ કેચ આઉટ આપવા પર નારાજગી વ્યક્ત કરી હતી. રોયે અપરાધ અને આઈસીસી મેચ રેફરી સંજન મદુગલે દ્વારા સંભળાવવામાં આવેલી સજાનો સ્વીકાર કરી લીધો છે.’

ઉલ્લેખનીય છે કે ગુરૂવારે ઈંગ્લેન્ડ અને ઓસ્ટ્રેલિયા વચ્ચે રમાયેલી વિશ્વ કપ સેમિફાઇનલ મેચમાં રોયે ૬૫ બોલમાં આક્રમક ૮૫ રન ફટકાર્યા હતા. ઈંગ્લેન્ડ આ મેચમાં ઓસ્ટ્રેલિયાને ૮ વિકેટે હરાવીને ટૂર્નામેન્ટની ફાઇનલમાં પહોંચી ગયું છે, જ્યાં તેનો મુકાબલો ન્યૂઝીલેન્ડ સામે થશે.